ນະຄອນຫຼວງວຽງຈັນ, ວັນທີ 25 ສິງຫາ 2026 – ບໍລິສັດ ໄຟຟ້ານ້ຳເທີນ 2 ຈຳກັດ (NTPC) ຂໍແຈ້ງໃຫ້ຊາບວ່າ ບໍລິສັດກຳລັງກະກຽມດຳເນີນການປ່ອຍນ້ຳແບບຄວບຄຸມ ຜ່ານປະຕູລະບາຍນ້ຳລົ້ນຂອງເຂື່ອນນາກາຍ ເພື່ອໃຫ້ສອດຄ່ອງກັບຂັ້ນຕອນການຄຸ້ມຄອງອ່າງເກັບນ້ຳ ແລະ ເພື່ອຮັບປະກັນຄວາມປອດໄພຂອງເຂື່ອນ.
ອີງຕາມການພະຍາກອນອາກາດຫຼ້າສຸດ ຈະມີປະລິມານນ້ຳຝົນຕົກຫຼາຍໃນເຂດອ່າງແມ່ນ້ຳເທີນ ໃນໄລຍະສອງສາມມື້ຂ້າງໜ້າ. ເນື່ອງຈາກປະລິມານນ້ຳໄຫຼເຂົ້າອ່າງເກັບນ້ຳສືບຕໍ່ເພີ່ມຂຶ້ນ, NTPC ຈຶ່ງໄດ້ຕິດຕາມສະພາບອຸທົກກະສາດ, ລະດັບນ້ຳໃນອ່າງເກັບນ້ຳ ແລະ ການພະຍາກອນອາກາດ.
ອີງຕາມການປະເມີນໃນປັດຈຸບັນ, ການປ່ອຍນ້ຳຜ່ານປະຕູລະບາຍນ້ຳລົ້ນແບບຄວບຄຸມ ອາດຈະເລີ່ມຕົ້ນແຕ່ ວັນທີ 26 ສິງຫາ 2026 ເປັນຕົ້ນໄປ, ໂດຍອັດຕາການປ່ອຍນ້ຳຈະຄ່ອຍໆເພີ່ມຂຶ້ນເປັນຂັ້ນຕອນ. ໄລຍະເວລາ ແລະ ປະລິມານການປ່ອຍນ້ຳ ຈະຂຶ້ນກັບສະພາບການໄຫຼເຂົ້າຂອງນ້ຳ ແລະ ສະພາບອາກາດຕົວຈິງ.
ການດຳເນີນງານນີ້ ແມ່ນມາດຕະການດ້ານຄວາມປອດໄພທີ່ວາງແຜນໄວ້ລ່ວງໜ້າ ແລະ ເປັນມາດຕະການປ້ອງກັນ ເພື່ອຮັກສາຄວາມປອກໄພຂອງອ່າງເກັບນ້ຳໃຫ້ພຽງພໍໃນລະດູຝົນ ແລະ ຮັບປະກັນການດຳເນີນງານທີ່ປອດໄພຢ່າງຕໍ່ເນື່ອງຂອງໂຮງງານໄຟຟ້ານ້ຳເທີນ 2. ການປ່ອຍນ້ຳຄັ້ງນີ້ແມ່ນປະຕິບັດຕາມຂັ້ນຕອນການດຳເນີນງານທີ່ກຳນົດໄວ້ ແລະ ບໍ່ໄດ້ສະແດງເຖິງບັນຫາດ້ານໂຄງສ້າງຂອງເຂື່ອນ ຫຼື ພື້ນຖານໂຄງລ່າງທີ່ກ່ຽວຂ້ອງແຕ່ຢ່າງໃດ.
NTPC ໄດ້ແຈ້ງໃຫ້ອົງການປົກຄອງພາກລັດທີ່ກ່ຽວຂ້ອງຊາບແລ້ວ ແລະ ກຳລັງປະສານງານຢ່າງໃກ້ຊິດກັບພາກສ່ວນທີ່ກ່ຽວຂ້ອງໃນລະດັບແຂວງ, ເມືອງ ແລະ ທ້ອງຖິ່ນ. ລະບົບເຕືອນໄພຊຸມຊົນ ແລະ ຊ່ອງທາງການສື່ສານ ກຳລັງຖືກນຳໃຊ້ ເພື່ອຮັບປະກັນການເຜີຍແຜ່ຂໍ້ມູນຂ່າວສານໄປສູ່ເຂດທີ່ອາດໄດ້ຮັບຜົນກະທົບຢ່າງທັນເວລາ.
ຄຳແນະນຳດ້ານຄວາມປອດໄພສຳລັບຊຸມຊົນ
ໃນລະຫວ່າງໄລຍະການປ່ອຍນ້ຳ, ຂໍແນະນຳໃຫ້ປະຊາຊົນທີ່ອາໄສຢູ່ຕາມແມ່ນ້ຳເທີນ:
- ຕິດຕາມຂໍ້ມູນຂ່າວສານຢ່າງໃກ້ຊິດຈາກການປະກາດທາງການຂອງອຳນາດການປົກຄອງທ້ອງຖິ່ນ ແລະ NTPC.
- ປະຕິບັດຕາມຄຳແນະນຳຈາກອຳນາດການປົກຄອງບ້ານ ແລະ ເຈົ້າໜ້າທີ່ຕອບໂຕ້ເຫດສຸກເສີນ.
- ຫຼີກລ່ຽງກິດຈະກຳທີ່ບໍ່ຈຳເປັນຢູ່ໃກ້ຝັ່ງແມ່ນ້ຳ ແລະ ເຂດທີ່ລະດັບນ້ຳອາດຈະເພີ່ມຂຶ້ນຢ່າງໄວ.
- ຫຼີກກລ້ຽງການຫາປາ, ການຂັບເຮືອ, ການຂ້າມທາງນ້ຳ ຫຼື ກິດຈະກຳຢູ່ໃກ້ແມ່ນ້ຳ.
ຄວາມປອດໄພຂອງຊຸມຊົນຍັງຄົງເປັນບູລິມະສິດສູງສຸດຂອງ NTPC. ບໍລິສັດຈະສືບຕໍ່ຕິດຕາມສະພາບການຕະຫຼອດ 24 ຊົ່ວໂມງ ແລະ ຈະລາຍງານຄວາມຄືບໜ້າຢ່າງເປັນປົກກະຕິຕາມການດຳເນີນງານ.
ຄຳໝັ້ນສັນຍາດ້ານຄວາມໂປ່ງໃສ
NTPC ໃຫ້ຄຳໝັ້ນສັນຍາທີ່ຈະໃຫ້ຂໍ້ມູນທີ່ຖືກຕ້ອງ, ທັນເວລາ ແລະ ໂປ່ງໃສຕະຫຼອດຂະບວນການນີ້. ຂໍ້ມູນຄວາມຄືບໜ້າຈະຖືກເຜີຍແຜ່ຜ່ານຊ່ອງທາງການສື່ສານທາງການ ແລະ ຜ່ານການປະສານງານກັບອົງການປົກຄອງພາກລັດ. ບໍລິສັດຂໍຂອບໃຈຕໍ່ການຮ່ວມມືຂອງຊຸມຊົນທ້ອງຖິ່ນ, ອຳນາດການປົກຄອງ ແລະ ພາກສ່ວນທີ່ກ່ຽວຂ້ອງ ອັນເປັນສ່ວນໜຶ່ງຂອງຄວາມພະຍາຍາມຮ່ວມກັນ ເພື່ອຮັບປະກັນຄວາມປອດໄພຂອງປະຊາຊົນໃນລະດູຝົນ.
