ປະຫວັດຄວາມເປັນມາ

ຄວາມເປັນໄປໄດ້ຂອງ ໂຄງການນ້ຳເທີນ ຢູ່ເຂດທົ່ງພຽງນາກາຍ ສຳລັບການສ້າງພະລັງງານໄຟຟ້າ ໄດ້ຮັບການລະບຸຕັ້ງແຕ່ປີ 1927, ແຕ່ວ່າບໍ່ໄດ້ດຳເນີນການສຶກສາລະອຽດ ຈົນເຖິງກາງຊຸມປີ 1970 ຈິ່ງເລີ່ມດຳເນີນການສຶກສາລະອຽດກ່ຽວກັບຄວາມເປັນໄປໄດ້ຂອງໂຄງການ. ໃນທ້າຍຊຸມປີ 1980 ລັດຖະບານລາວ ໄດ້ແນໃສ່ໂຄງການນ້ຳເທີນ 2 ໃຫ້ເປັນສິ່ງຂັບເຄື່ອນທີ່ສຳຄັນສຳລັບການພັດທະນາເສດຖະກິດ-ສັງຄົມຂອງປະເທດ, ແລະ ໄດ້ເຊື້ອເຊີນເອົາທະນາຄານໂລກ ໃຫ້ເຂົ້າຮ່ວມໃນໂຄງການ. ລັດຖະບານ ແລະ ຜູ້ລົງທຶນເອກະຊົນຫຼາຍພາກສວນ ໄດ້ສ້າງຕັ້ງບໍລິສັດຂຶ້ນມາ ແລະ ໃສ່ຊື່ວ່າ "Nam Theun 2 Electricity Consortium (NTEC)" ເພື່ອສຶກສາຄົ້ນຄວ້າ ແລະ ພັດທະນາໂຄງການດັ່ງກ່າວ. ໃນປີ 1994 ບໍລິສັດໄຟຟ້າຝຣັ່ງ ແລະ ບໍລິສັດ ມະຫາຊົນ ອີຕາລີ-ໄທ ພັດທະນາ ແຫ່ງປະເທດໄທ ໄດ້ເຂົ້າຮ່ວມໃນໂຄງການ, ແລະ ໄດ້ຫັນປ່ຽນຈາກແນວຄວາມຄິດ ມາສູ່ໄລຍະການພັດທະນາ. ການອອກແບບ ແລະ ການກະກຽມແບບຄົບຊຸດດ້ານເສດຖະກິດ, ການປົກປັກຮັກສາສິ່ງແວດລ້ອມ ແລະ ສັງຄົມ ແມ່ນໃຊ້ເວລາຫຼາຍກວ່າສິບປີ, ເຊິ່ງໃນໄລຍະທີ່ NTEC ກາຍມາເປັນ ບໍລິສັດ ໄຟຟ້ານ້ຳເທີນ 2 ຈຳກັດ, ຫຼື NTPC. ການຈັດຫາເງິນທຶນຂອງໂຄງການແມ່ນຄ່ອຍໆເປັນຮູບເປັນຮ່າງຂຶ້ນ ແລະ ກິດຈະກຳການກໍ່ສ້າງເຕັມສ່ວນ ໄດ້ເລີ່ມຕົ້ນຂຶ້ນໃນເດືອນມິຖຸນາ 2005.